Newidiadau i'r amserlen imiwneiddio i blant - Am y newidiadau i’r amserlen imiwneiddio i blant

Mae’r amserlen imiwneiddio (brechu) reolaidd i blant yng Nghymru yn cael ei diweddaru. 

Mae’r newid hwn yn cynnig amddiffyniad i blant rhag brech yr ieir, a gwell amddiffyniad fyth rhag clefydau fel y frech goch. 

Pa newidiadau fydd yn digwydd yn 2026?

Apwyntiad 18 mis oed:

O 1 Ionawr 2026, ychwanegir apwyntiad brechu newydd at yr amserlen imiwneiddio i blant yng Nghymru yn 18 mis oed. 
Yn yr apwyntiad 18 mis oed hwn, bydd babanod yn cael y brechlyn MMRV (gweler ‘Cyflwyno’r brechlyn rhag y frech goch, clwy’r pennau, rwbela a farisela (brech yr ieir)’ isod) a dos ychwanegol o’r brechlyn 6 mewn 1.
Rhoddir y dos ychwanegol o’r brechlyn 6 mewn 1 yn yr apwyntiad 18 mis oed newydd hwn i ddarparu amddiffyniad Hib a roddwyd yn flaenorol gyda Hib/MenC.

Cyflwyno’r brechlyn rhag y frech goch, clwy’r pennau, rwbela a brech yr ieir (farisela)

O 1 Ionawr 2026, cyflwynir brechlyn newydd o’r enw MMRV i’r amserlen imiwneiddio reolaidd i blant i helpu i amddiffyn rhag haint y frech goch, clwy’r pennau, rwbela a haint brech yr ieir (farisela).

Rhoddir y brechlyn MMRV i fabanod yn rhad ac am ddim gan y GIG fel rhan o’u brechiadau rheolaidd. Mae MMRV wedi cael ei ddefnyddio’n llwyddiannus mewn gwledydd eraill ers blynyddoedd lawer.

Rhoddir y dos cyntaf i fabanod pan fyddant yn 12 mis oed.
Rhoddir yr ail ddos pan fyddant yn 18 mis oed.

Rhoddir y brechlyn MMRV hefyd i rai plant cymwys yn dibynnu ar oedran eich plentyn ac a yw wedi cael haint brech yr ieir neu’r brechlyn rhag brech yr ieir yn y gorffennol.

Mae’r brechlyn MMR yn dal i fod ar gael i rai plant hŷn neu oedolion sydd wedi methu un neu’r ddau ddos o frechlyn sy’n cynnwys MMR, neu nad ydynt yn gymwys i gael y brechlyn MMRV.

Mae’n bwysig cael dau ddos o frechlyn sy’n cynnwys MMR i gael yr amddiffyniad gorau posibl. Gallwch ddysgu mwy am y brechlyn MMRV yn brechlynnau MMRV a MMR.

Rhaglen dal i fyny brech yr ieir

Mae rhaglen dal i fyny brech yr ieir ar gyfer plant cymwys rhwng 3 blwydd a 4 mis oed i ychydig o dan 6 oed. Bydd y rhaglen hon yn cynnig un dos o’r brechlyn MMRV ac yn rhedeg rhwng 1 Tachwedd 2026 a 31 Mawrth 2028. Mae ar gyfer plant nad ydynt wedi cael haint brech yr ieir neu ddau ddos o frechlyn brech yr ieir yn y gorffennol.

I gael atebion i gwestiynau cyffredin, gweler yr adran Cwestiynau Cyffredin am y newidiadau isod.

Pa frechlynnau sy’n cael eu rhoi a phryd?

Gan fod yr amserlen imiwneiddio yn newid, bydd cyfnod byr o addasu. Bydd yr hyn y disgwylir i’ch plentyn gael yn dibynnu ar ei oedran ar 1 Ionawr 2026, pan fydd y rhaglen newydd yn dechrau.

Mae’r canllaw cymhwysedd ar gyfer brechu isod yn rhoi gwybodaeth am ba frechlynnau a roddir i blant a phryd. Bydd eich nyrs practis neu’ch meddyg teulu yn cadarnhau cymhwysedd eich plentyn. Mae’n bwysig eu bod yn cael eu brechlynnau cyn gynted ag y cânt eu cynnig.

Gweler y rhaglen frechu gyflawn ar gyfer Cymru.

Y canllaw cymhwysedd ar gyfer brechu:

Mae eich plentyn yn 12 mis oed neu’n iau ar 1 Ionawr 2026

Oedran	Amserlen frechu
8 wythnos oed	6 mewn 1 MenB Rotafeirws
12 wythnos oed	6 mewn 1 MenB Rotafeirws
16 wythnos oed	6 mewn 1 PCV
12 mis oed	MMRV PCV MenB
18 mis oed (Apwyntiad newydd)	MMRV 6 mewn 1
3 blwydd 4 mis oed	4 mewn 1

Mae eich plentyn yn hŷn na 12 mis oed a hyd at 18 mis oed ar 1 Ionawr 2026

Os bydd eich plentyn eisoes wedi cael ei frechiadau 12 mis oed, gan gynnwys MMR, rhoddir:

Oedran	Amserlen frechu
18 mis oed (Apwyntiad newydd)	MMRV 6 mewn 1
3 blwydd 4 mis oed	MMRV 4 mewn 1
Mae derbyn 3 dos o frechlyn sy’n cynnwys MMR yn ddiogel.

Os cafodd eich plentyn ei frechiadau 16 wythnos oed, ond NAD yw wedi cael ei frechiadau 12 mis oed, siaradwch â’ch nyrs practis neu’ch meddyg teulu.

Mae eich plentyn yn hŷn na 18 mis oed a hyd at 3 blwydd a 4 mis oed ar 1 Ionawr 2026

Os bydd eich plentyn wedi cael ei frechlynnau i gyd hyd yma, ac wedi cael y brechlyn MMR yn ei apwyntiad 12 mis oed, rhoddir:

Oedran	Amserlen frechu
3 blwydd 4 mis oed	MMRV 4 mewn 1
Noder, nid yw pobl yn y grŵp oedran hwn yn gymwys ar gyfer yr apwyntiad 18 mis oed.

Mae eich plentyn yn hŷn na 3 blwydd a 4 mis oed i ychydig o dan 6 oed ar 1 Ionawr 2026

Bydd eich plentyn yn cael cynnig y brechlyn MMRV fel rhan o raglen dal i fyny ar gyfer brech yr ieir, os:

yw wedi cael ei frechlynnau, gan gynnwys MMR yn 12 mis oed a 3 blwydd a 4 mis oed, ond
nad yw wedi cael haint brech yr ieir na’r brechlyn rhag brech yr ieir.

Bydd eich plentyn yn derbyn llythyr yn ei wahodd i gael ei frechiad.

Os NAD yw eich plentyn wedi cael ei frechiadau yn 3 blwydd a 4 mis oed, siaradwch â’ch nyrs practis neu’ch meddyg teulu.

Mae eich plentyn yn 6 oed neu yn hŷn ar 1 Ionawr 2026

Nid yw plant a aned ar neu cyn 31 Rhagfyr 2019 yn gymwys i gael y brechlyn MMRV.

Brechlynnau ar gyfer plant oedran ysgol a phobl ifanc

Gallwch ddod o hyd i wybodaeth ac adnoddau am frechlynnau ar gyfer plant oedran ysgol a phobl ifanc.

Cwestiynau cyffredin am y newidiadau

Oes angen i mi roi paracetamol i’m baban ar ôl ei frechiadau 16 wythnos?

I gael gwybodaeth am roi paracetamol i’ch baban ar ôl ei frechiad MenB, ewch i dudalen eningococol grŵp B (MenB).

Am rhagor o wybodaeth, sy’n cynnwys dosau paracetamol, gweler y taflenni:

A yw’n iawn i’m plentyn gael y brechlyn Hib yn 18 mis oed pan gafodd ei roi i blentyn yn 12 mis oed yn y gorffennol?

Mae astudiaethau wedi dangos bod symud y dos Hib (ffliw haemophilus math b) i 18 mis yn arwain at well amddiffyniad hirdymor. Mae hyn oherwydd bod ymatebion imiwnedd cryfach i’r brechlyn i’w gweld yn y grŵp oedran hŷn.

Adolygwyd y dudalen hon ddiwethaf: 20fed Ionawr 2026