Brechlynnau sy'n cynnwys y frech goch, clwy'r pennau, rwbela a brech yr ieir (MMRV ac MMR) - Cymhwysedd ar gyfer y brechlynnau MMRV ac MMR
Brechlyn MMRV – y frech goch, clwy’r pennau, rwbela a varicella (brech yr ieir)
Cynigir y brechlyn MMRV am ddim gan y GIG fel rhan o’r rhaglen frechu reolaidd i blant.
O 1 Ionawr 2026:
Cynigir y brechlyn MMRV i fabanod 12 mis oed neu iau ar 1 Ionawr 2026 fel rhan o’u brechiadau rheolaidd:
- Cynigir y dos cyntaf i fabanod sy’n 12 mis oed.
- Cynigir yr ail ddos i fabanod sy’n 18 mis oed. Mae’r ymweliad yn 18 mis oed yn apwyntiad brechu newydd.
Mae’n bwysig cael dau ddos o frechlyn sy’n cynnwys MMR i gael yr amddiffyniad gorau posibl. Mae cael y ddau ddos yn rhoi amddiffyniad hirdymor rhag haint.
Efallai y bydd rhai plant hŷn yn cael cynnig brechiad MMRV fel rhan o’r rhaglen dal i fyny ar gyfer brech yr ieir. Mae hyn yn dibynnu ar eu hoedran ac a ydynt wedi cael haint y frech goch neu ddau ddos o frechlyn y frech goch (varicella) yn y gorffennol.
Mae’r brechlyn MMRV wedi cael ei ddefnyddio ers blynyddoedd lawer mewn gwledydd eraill fel Awstralia, Canada a Seland Newydd. Mewn gwledydd eraill, mae rhoi’r brechlyn MMRV wedi arwain at ostyngiad mawr mewn achosion o frech yr ieir mewn plant.
I gael rhagor o wybodaeth am yr amserlen imiwneiddio yng Nghymru a phryd y cynigir brechiadau i’ch plentyn, ewch i newidiadau i’r drefn imiwneiddio i blant ac amserlenni imiwneiddio arferol i Gymru.
Brechlyn MMR – y frech goch, clwy’r pennau a rwbela
O fis Ionawr 2026 ymlaen, ni fydd y brechlyn MMR bellach yn rhan o raglen frechu reolaidd i blant y GIG.
Fodd bynnag, mae’r brechlyn MMR yn dal i fod ar gael i blant hŷn ac oedolion nad ydynt wedi cael dau ddos o frechlyn sy’n cynnwys MMR ac nad ydynt yn gymwys i gael MMRV.
Os nad ydych chi wedi cael dau ddos o frechlyn sy’n cynnwys MMR, rydych chi mewn perygl o ddal y clefydau y mae’r brechlyn yn helpu i amddiffyn rhagddynt. Hyd yn oed os ydych chi’n meddwl eich bod chi wedi cael brechiadau sy’n cynnwys MMR o’r blaen ond ddim yn siŵr, neu os nad oes gennych chi gofnod o hyn, mae’n ddiogel cael dosau pellach.
Gallwch chi ddal i fyny â dosau MMR a fethwyd ar unrhyw oedran. Cysylltwch â’ch practis meddygon teulu cyn gynted â phosibl i ddal i fyny ag unrhyw frechiadau MMR a fethwyd.
Sut byddaf yn gwybod pryd mae fy mhlentyn i fod i gael ei frechiadau rheolaidd?
Ar gyfer y rhan fwyaf o frechiadau rheolaidd, bydd eich bwrdd iechyd lleol yn anfon llythyr atoch pan fydd eich plentyn yn gymwys. Yna bydd eich plentyn yn cael gwahoddiad i gael ei frechlyn yn ei bractis meddygon teulu, neu leoliad brechu arall. Cyn yr apwyntiad: Rhowch wybod i’ch meddyg neu’r nyrs practis a yw’ch plentyn wedi cael unrhyw frechiadau eraill yn ddiweddar.
Mae GIG Cymru yn argymell brechu eich plentyn cyn gynted ag y caiff y brechiadau eu cynnig. Os ydych chi’n meddwl bod eich plentyn wedi methu’r gwahoddiad neu’r apwyntiad, cysylltwch â’ch practis meddygon teulu.
Sut ydw i’n darganfod statws brechu fy mhlentyn?
Mae manylion brechu ar gael yn Llyfr Coch eich plentyn.
Bydd gwefan eich Bwrdd Iechyd lleol hefyd yn cynnwys rhagor o fanylion ar sut i ddarganfod statws brechu eich plentyn a sut i archebu brechiad os oes angen.
Mae dolenni i dudalennau gwybodaeth MMR byrddau iechyd isod:
- Blaenau Gwent
- Caerffili
- Sir Fynwy
- Casnewydd
- Torfaen
- Ynys Môn
- Gwynedd
- Conwy
- Sir Ddinbych
- Sir y Fflint
- Wrecsam
- Caerdydd
- Bro Morgannwg
Cwm Taf Morgannwg
- Pen-y-bont ar Ogwr
- Merthyr Tudful
- Rhondda Cynon Taf
- Gwiriwch statws brechiad MMR eich plentyn – Bwrdd Iechyd Prifysgol Cwm Taf Morgannwg
- Imiwneiddiadau Plentyndod – Bwrdd Iechyd Prifysgol Cwm Taf Morgannwg
Hywel Dda
- Sir Gaerfyrddin
- Ceredigion
- Sir Benfro
- Brechu plant a phobl ifanc – Bwrdd Iechyd Prifysgol Hywel Dda
- Mynediad at frechlyn i blant sy’n cael eu haddysgu gartref – Bwrdd Iechyd Prifysgol Hywel Dda
- Powys
- Abertawe
- Castell-nedd Port Talbot
Adolygwyd y dudalen hon ddiwethaf: 19eg Ionawr 2026