Tywydd poeth - Cadw’n oer

Cadw allan o’r gwres

Dylech geisio aros dan do neu yn y cysgod, yn enwedig rhwng 11am a 3pm.
Dylech osgoi gweithgareddau awyr agored fel chwaraeon, DIY neu arddio. Os na allwch chi osgoi’r gweithgareddau hyn, dylech eu gwneud nhw’n gynnar yn y bore neu’n hwyrach gyda’r nos.
Defnyddiwch eli haul â ffactor amddiffyn rhag yr haul (SPF) 30 o leiaf ag amddiffyniad UVA 4 seren o leiaf.
Gwisgwch ddillad sy’n eich amddiffyn rhag yr haul fel topiau llewys hir neu fathau eraill o ddillad lliw golau, llac.
Gwisgwch het â chantel llydan i amddiffyn eich wyneb, eich llygaid, eich pen a’ch clustiau, a sbectol haul i amddiffyn eich llygaid.
Cofiwch yfed digon o ddŵr drwy gydol y dydd. Dylech osgoi alcohol, caffein, diodydd poeth a diodydd llawn siwgr rhag ofn eu bod yn eich dadhydradu.

Dylech gau bleindiau a llenni ffenestri sy’n wynebu golau’r haul yn ystod y dydd.
Symudwch i ran oerach o’r tŷ, yn enwedig ar gyfer cysgu.
Agorwch ffenestri (os yw’n ddiogel gwneud hynny) pan fydd yr aer yn teimlo’n oerach y tu allan na’r tu mewn, er enghraifft yn y nos, a cheisiwch gael yr aer i lifo trwy eich cartref.
Defnyddiwch wyntyll drydan os yw tymheredd yr aer yn is na 35°C (os yw’r tymheredd yn uwch na hyn, mae’n bosibl na fydd yn helpu i oeri’r gofod), ond peidiwch â gosod y wyntyll i wynebu’ch corff yn uniongyrchol rhag ofn i hyn achosi dadhydradu.
Cofiwch sicrhau bod unrhyw wres wedi’i ddiffodd.
Diffoddwch oleuadau ac offer trydanol nad ydynt yn cael eu defnyddio.
Ewch i’r awyr agored os yw’n oerach yn y cysgod.

Cofiwch sicrhau bod aelodau’r teulu, ffrindiau a chymdogion yn iawn. Gofalwch am blant, babanod, pobl hŷn, pobl sy’n sâl neu bobl sy’n byw ar eu pennau eu hunain.
Cofiwch sicrhau nad yw babanod, plant, pobl hŷn ac anifeiliaid anwes yn cael eu gadael ar eu pennau eu hunain mewn ceir wedi’u parcio neu fannau caeedig eraill.
Os ydych chi’n poeni am eich symptomau chi eich hun neu symptomau rhywun arall, gofynnwch am gyngor meddygol trwy gysylltu â GIG 111. Mewn argyfwng ffoniwch 999.

Dylech barhau i gymryd eich holl feddyginiaethau presgripsiwn oni bai bod gweithiwr iechyd proffesiynol yn eich cynghori i beidio â’u cymryd.
Mae angen cadw rhai meddyginiaethau o dan 25°C neu yn yr oergell (darllenwch y cyfarwyddiadau ar y pecyn).

Dywedwch wrth rywun os ydych chi’n teimlo’n sâl.
Symudwch i le oer i orffwys.
Dylech fwyta bwyd oer ac yfed diodydd oer, ond cofiwch osgoi alcohol, caffein, diodydd poeth a diodydd llawn siwgr rhag ofn iddyn nhw eich dadhydradu.
Os ydych chi’n poeni am eich symptomau chi eich hun neu am symptomau rhywun arall, gofynnwch am gyngor meddygol trwy gysylltu â GIG 111. Mewn argyfwng ffoniwch 999.

Adolygwyd y dudalen hon ddiwethaf: 6ed Mawrth 2025