Ynglŷn â sgrinio'r fron - Eich apwyntiad sgrinio’r fron

Mae’r fideo byr hwn yn helpu pobl i ddeall beth yw sgrinio’r fron a pham mae’n bwysig. Mae’n eich tywys drwy’r daith sgrinio, gan ddangos sut mae pelydr-X y fron (mamogram) yn cael ei gymryd ac yn dweud wrthych am yr ystod o gymorth sydd ar gael.

Ble y byddaf yn cael fy sgrinio?

Cewch wahoddiad i fynychu sesiwn sgrinio yn un o’r unedau sgrinio symudol neu mewn canolfan sgrinio. Bydd eich llythyr gwahodd yn nodi ble y cewch eich sgrinio. Bydd lle y cewch eich sgrinio yn dibynnu gyda pa bractis meddyg teulu rydych wedi’ch cofrestru.

Newid fy apwyntiad

Cysylltwch â ni os na allwch fynychu eich apwyntiad. Efallai y gallwn gynnig amser, dyddiad neu leoliad mwy cyfleus i chi.

Mae apwyntiadau sgrinio’r fron yn brin. Rhowch wybod i ni os ydych yn bwriadu peidio â dod i’ch apwyntiad gan y gallwn gynnig eich apwyntiad i rywun arall.

Os nad oes angen eich apwyntiad arnoch mwyach, cysylltwch â ni i drafod sut y gallwn eich cefnogi.

Os gwnaethoch fethu eich apwyntiad sgrinio’r fron, gallwch gysylltu â ni i drefnu apwyntiad newydd. Mae’n bwysig nad ydych yn aros am dair blynedd nes eich bod yn cael eich gwahodd eto.

Paratoi ar gyfer fy apwyntiad

Cyn eich apwyntiad:

Darllenwch yr wybodaeth rydym wedi’i hanfon atoch.
Cysylltwch â ni os oes angen cymorth yn ystod eich apwyntiad.
Sicrhewch eich bod yn gwybod ymhle mae eich apwyntiad.
Cynlluniwch sut y byddwch yn cyrraedd, dylech ganiatáu digon o amser i deithio.
Byddwch yn ymwybodol efallai y bydd angen i chi dalu i barcio yn rhai o’r lleoliadau sgrinio.
Dylech ganiatáu o leiaf 30 munud ar gyfer eich apwyntiad.
Mae’n syniad da gwisgo trowsus neu sgert a thop, yn hytrach na ffrog, gan y bydd gofyn i chi ddadwisgo o’r wasg i fyny.
Cyn eich apwyntiad, peidiwch â defnyddio diaroglydd chwistrell neu bowdr talc am y gall hwn ddangos i fyny ar eich pelydr-X o’r fron. Gallwch ddefnyddio diaroglydd rholio.

Cysylltwch â ni cyn dod i’ch apwyntiad, os:

oes gennych anabledd corfforol neu os ydych chi’n cael trafferth â grisiau, er mwyn i ni allu gwneud trefniadau addas i chi
ydych chi wedi cael pelydr-x o’r fron o fewn y 6 mis diwethaf, neu os ydych chi’n feichiog neu’n bwydo ar y fron; os felly, efallai y cewch chi eich cynghori i ohirio prawf sgrinio’r fron
ydych wedi cael diagnosis o ganser y fron yn ddiweddar, neu’n cael triniaeth ar hyn o bryd
nad oes modd efallai i chi roi caniatâd i sgrinio’r fron
ydych yn ofalwr sydd â phŵer atwrnai parhaol ar gyfer eich iechyd a lles
oes gennych anghenion cyfathrebu neu gyfieithu, neu
ydych yn drawsrywiol ac yn dymuno trafod eich apwyntiad

Eich cadw’n ddiogel yn eich apwyntiad

Mae’r mesurau canlynol ar waith er mwyn cadw pawb yn ddiogel yn ystod eu hapwyntiad:

Mae staff gofal iechyd yn dilyn canllawiau atal a rheoli heintiau. Mae hyn yn golygu eu bod yn dilyn arferion glanhau dwylo llym ac yn glanhau holl ardaloedd ac offer y clinig yn rheolaidd.
Mae hylif diheintio dwylo ar gael.
Ewch i’ch apwyntiad ar amser. Os byddwch yn cyrraedd yn gynnar, efallai y bydd yn rhaid i chi aros. Os ydych yn hwyr, efallai na fyddwn yn gallu eich sgrinio.
Os oes angen cyfieithydd arnoch, os ydych yn dod gyda gofalwr neu angen cymorth yn eich apwyntiad, cysylltwch â ni cyn eich apwyntiad i drafod hyn.

Cofiwch, er mwyn atal haint rhag lledaenu, peidiwch â dod i’ch apwyntiad sgrinio os ydych yn sâl.

Cyrraedd eich apwyntiad

Ewch i’ch apwyntiad ar amser. Os byddwch yn cyrraedd yn gynnar, efallai y bydd yn rhaid i chi aros. Os ydych yn hwyr, efallai na fyddwn yn gallu eich sgrinio.

Oherwydd maint yr uned symudol, gofynnwn i chi ddod i’r apwyntiad ar eich pen eich hun. Os oes angen cymorth arnoch yn ystod eich apwyntiad, cysylltwch â ni cyn mynychu.

Ni fyddwn yn gallu gwneud y prawf sgrinio os dewch â phlant gyda chi. Mae hyn am resymau iechyd a diogelwch.

Sylwch nad oes cyfleusterau toiled ar yr uned symudol.

Am y prawf

Pan fyddwch yn cyrraedd yr uned sgrinio’r fron, bydd y staff yn gwirio eich manylion ac yn gofyn i chi ynghylch unrhyw broblemau bron rydych wedi’u cael. Os oes gennych unrhyw gwestiynau, gofynnwch.

Cyflawnir pelydr-x bronnau gan staff benywaidd a elwir yn Radiograffwyr neu’n Ymarferwyr Cynorthwyol. Byddant yn esbonio’r hyn fydd yn digwydd. Gofynnir i chi newid yn yr ystafell pelydr-x neu mewn ciwbicl newid preifat. Bydd angen i chi dynnu eich bra ac os byddwch mewn ciwbicl newid gwisgwch eich dillad uchaf hyd nes y byddwch yn mynd i’r ystafell pelydr-x. Efallai bydd yn haws gwisgo sgert neu drowsus yn hytrach na ffrog.

Pan gewch eich galw ar gyfer eich pelydr-x o’r fron, bydd yr aelod o staff sy’n gwneud y profion yn rhoi eich bron ar y peiriant pelydr-x. Caiff plât plastig ei ostwng i wasgu’r fron. Mae hyn y bwysig iawn gan ei fod yn helpu i gadw’ch bron yn llonydd a chael delwedd pelydr-x clir. Cymerir o leiaf dau belydr-x o bob bron.

Dim ond ychydig o funudau y bydd y prawf yn ei gymryd. Mae pawb yn wahanol; gall y prawf fod yn anghysurus neu’n boenus i rai pobl. Mae hyn fel arfer yn pasio’n gyflym. Dywedwch wrth yr aelod o staff sy’n gwneud y prawf a fyddwch am roi’r gorau i’r prawf ar unrhyw adeg.

Os oes gennych fewnblaniadau bronnau neu lenwyr chwistrelladwy, byddwch yn cael taflen wybodaeth i’w darllen, oherwydd gall y rhain wneud sgrinio’n anoddach.

Os oes gennych unrhyw gwestiynau, gallwch ofyn i aelod o staff sgrinio.

Os na all yr aelod o staff gwblhau pelydr-x o’ch bron, mae’n bosibl y byddwch yn dal i dderbyn canlyniad ar yr mannau a gymerwyd pelydr-x ohonynt.

A fydd y driniaeth yn brifo?

Mae angen gwasgu’ch bronnau rhwng dau blât i gynhyrchu mamogramau o ansawdd da gyda dos isel o ymbelydredd. Dim ond am ychydig eiliadau y bydd y pwysau’n para. Os byddwch yn profi poen, fel arfer dim ond cyhyd ag y mae’r driniaeth yn para y bydd hynny. Mewn nifer fach iawn o fenywod, gall bara’n hirach.

Efallai y gofynnir i chi a hoffech gymryd rhan mewn treial clinigol

Mae’r rhain yn astudiaethau ymchwil feddygol. Bydd unrhyw dreial a gynigir i chi yn casglu gwybodaeth am y mathau gorau o brofion neu driniaethau canser y fron, er mwyn i ni allu helpu menywod yn fwy effeithiol yn y dyfodol. Chi sy’n dewis a ydych am gymryd rhan ai peidio.

Adolygwyd y dudalen hon ddiwethaf: 11eg Chwefror 2026