Y Rhaglen Cwricwlwm

Mae’r Cwricwlwm i Gymru yn rhoi Iechyd a Lles wrth wraidd datblygiad dysgwyr, gan gydnabod ei rôl hanfodol wrth alluogi plant a phobl ifanc i ffynnu. Gofynnodd ysgolion am ddeunyddiau cymorth clir a dibynadwy i’w helpu i ddehongli canllawiau’r cwricwlwm a’u trawsnewid yn brofiadau dysgu ystyrlon.

Mewn ymateb, ffurfiodd Iechyd Cyhoeddus Cymru bartneriaeth ag arbenigwyr pwnc a gweithwyr addysg proffesiynol i gyd-gynhyrchu cyfres o becynnau cymorth cwricwlwm. Mae’r pecynnau cymorth hyn yn trosi themâu allweddol iechyd a lles yn ddulliau ymarferol yn yr ystafell ddosbarth, gan sicrhau bod y cynnwys yn seiliedig ar dystiolaeth a’i fod wedi’i wreiddio mewn ymarfer addysgu yn y byd go iawn.

Beth yw pecynnau cymorth y cwricwlwm?

Mae pecynnau cymorth y cwricwlwm yn gasgliadau o ddeunyddiau cymorth hyblyg, parod i’w defnyddio, sydd wedi’u cynllunio i helpu ysgolion i gynllunio a chyflwyno dysgu Iechyd a Lles. Mae pob pecyn cymorth yn canolbwyntio ar faes pwnc penodol, a gall gynnwys:

• Canlyniadau dysgu sy’n cyd-fynd â’r cwricwlwm
• Syniadau a gweithgareddau ar gyfer gwersi
• Canllawiau i athrawon a staff cymorth
• Dolenni i dystiolaeth ddibynadwy ac adnoddau ychwanegol
• Offerynnau i helpu i werthuso dysgu

Nid cynlluniau gwaith rhagnodol ydynt. Yn hytrach, maent yn darparu cymorth strwythuredig y gall ysgolion ei addasu i ddiwallu anghenion eu dysgwyr a’r cyd-destun lleol

Gyda phwy rydym yn gweithio i’w cynhyrchu nhw?

Mae ein pecynnau cymorth wedi’u datblygu mewn cydweithrediad â rhwydwaith eang o bartneriaid, gan gynnwys:

• Arbenigwyr Iechyd Cyhoeddus Cymru
• Rhwydwaith Ysgolion Hybu Iechyd Cymru
• Sefydliadau addysg yng Nghymru
• Ymarferwyr yn yr ystafell ddosbarth ac arweinwyr cwricwlwm
• Sefydliadau arbenigol sy’n benodol i bynciau
  Mae’r dull cyd-gynhyrchu hwn yn sicrhau bod y pecynnau cymorth

Mae’r dull cyd-gynhyrchu hwn yn sicrhau bod y pecynnau cymorth wedi’u seilio ar dystiolaeth, eu bod yn cyd-fynd â pholisi cenedlaethol, ac wedi’u llunio gan realiti ymarferol addysgu yn ysgolion Cymru.

Sut y gall ysgolion ddefnyddio’r pecynnau cymorth?

Gall ysgolion ddefnyddio’r pecynnau cymorth mewn amrywiaeth o ffyrdd, gan ddibynnu ar gynllun ac anghenion eu cwricwlwm. Maent yn cefnogi’r canlynol:

• Cynllunio cwricwlwm – darparu canllawiau strwythuredig ar gyfer adeiladu neu fireinio darpariaeth Iechyd a Lles.
• Datblygu gwersi – cynnig gweithgareddau, adnoddau ac enghreifftiau addasadwy.
• Dysgu proffesiynol – helpu staff i feithrin hyder ac eglurder ynghylch themâu iechyd allweddol.
• Dulliau ysgol gyfan – cefnogi negeseuon cyson ar draws addysgu, gofal bugeiliol a’r diwylliant ysgol ehangach.

Mae’r pecynnau cymorth yn gwbl hyblyg, gan alluogi ysgolion i’w teilwra i’w dysgwyr a’u cymuned.