Tywydd oer
Gall tywydd oer waethygu rhai problemau iechyd ac achosi peryglon iechyd eraill.
Gall tywydd oer achosi hypothermia, cwympiadau ac anafiadau, trawiad ar y galon, strôc, clefydau anadlol a’r ffliw, problemau iechyd meddwl (fel iselder a gorbryder) a gwenwyn carbon monocsid yn sgil boeleri heb eu cynnal a’u cadw/neu wedi’u hawyru’n wael, offer coginio a gwresogi diffygiol.
Gall salwch cysylltiedig ag oerni a thywydd oer difrifol roi pwysau ar ysbytai, adrannau brys a meddygfeydd.
Feirysau a germau
Cadwch yn ddiogel rhag y ffliw trwy gael eich pigiad ffliw.
Gorchuddiwch eich trwyn a’ch ceg â hances wrth besychu neu disian. Dylech annog ffrindiau a theulu i wneud hyn hefyd i atal feirysau a bacteria rhag lledaenu.
Taflwch hancesi papur i’r bin cyn gynted â phosibl.
Cofiwch ymolchi’ch dwylo’n rheolaidd gyda sebon a dŵr neu ddefnyddio hylif diheintio sy’n cynnwys 60% alcohol o leiaf.
Defnyddiwch hancesi papur a meddyginiaethau ar gyfer annwyd a pheswch o’ch fferyllfa.
I ddysgu mwy am y ffliw ewch i wefan GIG 111.
Cadw eich cartref yn gynnes a diogel
- Gwnewch yn siŵr bod eich cartref yn ddigon cynnes – tua 18°C/65°F (ystafell wely) a 21°C/70°F (ystafell fyw).
- Gallech wresogi un ystafell yn unig ac aros ynddi gymaint â phosibl.
- Dylai babanod gysgu mewn ystafelloedd sydd wedi’u gwresogi rhwng 16°C ac 20°C.
- Cadwch ddrafft oer allan a gwres i mewn trwy ddiogelu ymylon ffenestri a drysau. Er hynny, cadwch y mannau awyru yn glir ac agored.
- Dylai eich offer gwresogi a choginio gael gwasanaeth o leiaf unwaith y flwyddyn gan beiriannydd proffesiynol. I ddod o hyd i beiriannydd cofrestredig: Offer nwy: Gas Safe. Offer Tanwydd Solid: HETAS (Saesneg yn unig).
- Gwiriwch a allwch gael help, budd-daliadau neu gyngor er mwyn i’ch cartref ddefnyddio ynni yn fwy effeithlon, a gwella’ch system wresogi neu i helpu gyda biliau. Am ragor o gefnogaeth, ewch i Cyngor ar Bopeth a’r Taliad Tanwydd Gaeaf.
Cadwch eich hun yn gynnes
- Mae bwyd yn ffynhonnell egni hanfodol, sy’n helpu i gadw’ch corff yn gynnes. Gwnewch yn siŵr eich bod yn cael prydau a diodydd poeth (te, coffi neu goco) drwy gydol y dydd.
- Ni fydd yfed alcohol yn eich cadw’n gynnes.
- Cadwch yn brysur gartref os gallwch chi.
- Gwisgwch sawl haen denau o ddillad wedi’u gwneud o gotwm, gwlân neu fleece yn hytrach nag un haen drwchus.
- Cadwch yn gynnes yn y gwely gyda blancedi a sawl haen denau o ddillad.
- Mae llawer o wres y corff yn cael ei golli o’r pen. Os oes rhaid i chi fynd allan, gwisgwch het a chofiwch wisgo esgidiau â gwadnau sy’n cydio.
Gwyliwch rhag hypothermia
Mae hypothermia yn digwydd os yw tymheredd y corff o dan 35°C (mae tymheredd arferol y corff tua 37°C). Mae hyn yn argyfwng meddygol ac mae angen ei drin yn yr ysbyty.
Dysgwch beth yw’r symptomau. Ewch i adran frys eich ysbyty neu ffoniwch 999
Os bydd :
- rhywun yn crynu
- gan rywun groen gwelw, oer a sych – neu’r croen a’r gwefusau yn las
- tafod rhywun yn dew wrth siarad
- yn anadlu’n araf
- wedi blino neu wedi drysu.
Bydd babi sy’n dioddef hypothermia yn:
- oer wrth ei gyffwrdd a gall y croen fod yn goch
- llipa
- anarferol o dawel a chysglyd ac efallai yn gwrthod bwydo.
Am ragor o wybodaeth ewch i NHS Hypothermia (Saesneg yn unig).