Cymhwystra ar gyfer y brechlyn - Cymhwysedd i weithwyr dofednod ar gyfer y brechlyn ffliw

Gall gweithwyr dofednod 18 oed a hŷn sy’n byw yng Nghymru gael brechlyn ffliw GIG Cymru am ddim yr hydref/gaeaf hwn.   

Gall cyflogwyr gweithwyr dofednod roi’r llythyr cadarnhad i staff i fynd ag ef i’r fferyllfa i gael eu brechlyn.

Pam fod gweithwyr dofednod bellach yn gymwys i gael brechlyn ffliw?

Mae Llywodraeth Cymru wedi cymryd cyngor gan y Cyd-bwyllgor ar Imiwneiddio a Brechu (JCVI).  

Y nod yw lleihau’r risg y bydd gweithwyr dofednod yn cael ffliw dynol a ffliw adar ar yr un pryd. Bydd hyn yn helpu i atal creu math newydd o ffliw sy’n lledaenu rhwng pobl. 

Pa weithwyr dofednod sy’n gymwys i gael brechlyn ffliw?

Yng Nghymru, efallai y byddwch yn gymwys i gael brechlyn ffliw os ydych yn gweithio gydag adar ac yn ymwneud â dal, difa, glanhau, neu brosesu dofednod.  

Rhaid i chi fod yn 18 oed neu’n hŷn, yn byw yng Nghymru ac yn bodloni’r meini prawf canlynol i gael brechlyn ffliw:  

1. Rydych yn gweithio ar safle lle mae ffliw adar tybiedig neu wedi’i gadarnhau ac rydych yn: 

• dal neu ddifa adar 
• glanhau ardaloedd caeedig 
• casglu adar sydd wedi marw 

2. Rydych chi’n gweithio’n rheolaidd neu’n ymweld â safleoedd dofednod cofrestredig sydd â 50 neu fwy o adar ac yn: 

• ymweld yn rheolaidd ag ardaloedd lle mae adar yn cael eu magu neu lle cynhyrchir wyau 
• casglu neu symud tail o’r man lle mae adar yn cael eu magu neu wyau yn cael eu cynhyrchu 
• glanhau siediau dofednod ar ôl i’r adar gael eu symud 
• didoli wyau os yw’r ardaloedd didoli yn rhan o’r uned gynhyrchu 
• dal neu ddifa dofednod mewn mannau caeedig lle cânt eu magu neu lle cynhyrchir wyau 

3. Rydych yn gweithio mewn unedau prosesu dofednod ac yn: 

• dal a thrin adar byw 
• lladd a phrosesu adar 
• glanhau a diheintio ardaloedd ac offer sydd wedi’u gorchuddio â baw adar 

Mae safleoedd dofednod yn lleoedd lle mae adar fel ieir, hwyaid a thyrcwn yn cael eu cadw a’u magu mewn caethiwed. Mae dofednod yn golygu pob aderyn a gedwir ar gyfer cynhyrchu cig neu wyau, ar gyfer gwneud cynhyrchion eraill, ar gyfer ailstocio adar hela gwyllt, neu ar gyfer bridio.  

Pa weithwyr dofednod nad ydynt yn gymwys i gael y brechlyn ffliw?

Nid yw’r bobl ganlynol yn cael eu hystyried o wynebu risg uwch o ddod i gysylltiad â feirysau ffliw adar: 

• Pobl sy’n gweithio ger ffermydd sydd â dofednod ond nad ydynt yn mynd i’r ardaloedd lle cedwir adar neu lle mae wyau’n cael eu didoli. 
• Pobl sy’n danfon deunyddiau i unedau dofednod. 
• Pobl sy’n casglu neu’n danfon wyau neu ddofednod (byw neu farw) o unedau dofednod*.  
• Pobl sy’n gweithio mewn unedau prosesu dofednod ac yn trin adar marw ond nad ydynt yn lladd nac yn prosesu adar*. 

*Oni bai bod y bobl hyn hefyd yn gwneud tasgau a grybwyllir yn yr adran cymhwyster uchod. 

Beth sydd angen i mi ei wneud?

I gael eich brechlyn, mae angen i chi ddangos eich llythyr cadarnhad neu fath arall o brawf eich bod yn weithiwr dofednod (e.e. slip cyflog neu fathodyn adnabod staff) i’r fferyllfa gymunedol.

A fydd y brechlyn ffliw yn fy atal rhag cael ffliw adar?

Na fydd, ni fydd y brechlyn ffliw yn eich amddiffyn rhag ffliw adar. Fodd bynnag, bydd y brechlyn yn rhoi amddiffyniad rhag ffliw dynol. Bydd hyn yn lleihau’r risg o gael ffliw adar a ffliw dynol ar yr un pryd, a allai arwain at fath newydd o ffliw sy’n gallu lledaenu rhwng pobl. Bydd y brechlyn ffliw hefyd yn helpu i leihau’r risg o salwch difrifol pe baech yn dal y ddau fath o’r ffliw ar yr un pryd.

Adolygwyd y dudalen hon ddiwethaf: 25ain Mawrth 2026