Atal cenhedlu - Dewis dull atal cenhedlu

Pa ddull atal cenhedlu sy’n iawn i mi?

Mae dulliau atal cenhedlu yn amddiffyn rhag beichiogrwydd. Mae 15 o ddulliau atal cenhedlu ar gael yn y DU ar hyn o bryd.

Mae angen defnyddio dulliau atal cenhedlu tan y menopos. Mae hyn ddwy flynedd ar ôl eich mislif diwethaf os ydych dan 50, neu flwyddyn ar ôl eich mislif diwethaf os ydych dros 50. Gall y cyngor hwn fod yn wahanol os ydych yn defnyddio dull atal cenhedlu hormonaidd. Mae’r rhan fwyaf o’r dulliau atal cenhedlu wedi’u dylunio i’w defnyddio gan fenywod. Er hyn, mae’r condom dynion yn ddewis poblogaidd o hyd.

Mae’n werth cymryd amser i ddarganfod mwy am bob dull er mwyn i chi allu dewis un sy’n gweddu i chi. O’r 15 dull, mae dau yn benodol ar gyfer dynion – y condom (dynion) allanol a diffrwythloni dynion (fasdoriad) – ac mae 13 ar gyfer menywod. Bydd y math sy’n gweithio orau i chi yn dibynnu ar eich oed, eich iechyd a’ch amgylchiadau. Er enghraifft, ydych chi eisiau gwneud atal cenhedlu yn rhan o’ch trefn ddyddiol ai peidio? Oes gwahaniaeth gennych chi os bydd eich mislif yn newid? Beth os nad ydych yn gallu defnyddio dulliau atal cenhedlu hormonaidd?

A yw atal cenhedlu yn effeithio ar ffrwythlondeb yn y dyfodol?

Mae defnyddio rhai dulliau atal cenhedlu hormonaidd yn gysylltiedig ag oedi wrth ddychwelyd i ffrwythlondeb. Mae dulliau atal cenhedlu chwistrelladwy yn dangos yr oedi hiraf (pump i wyth mis). Fodd bynnag, prin iawn yw’r effaith barhaol, os o gwbl, o ddefnyddio’r dulliau hyn yn y tymor hir sydd ar y siawns o feichiogi pan fyddwch chi’n barod i roi cynnig arni.

Sut alla i ddod o hyd i wasanaeth atal cenhedlu?

Mae tri chwarter y dulliau atal cenhedlu yn cael eu darparu mewn gofal sylfaenol, a’r gweddill gan fferyllfeydd a chlinigau iechyd rhywiol. Mae atal cenhedlu brys ar gael hefyd gan eich meddyg teulu, ac mewn clinigau iechyd rhywiol a fferyllfeydd. Gallwch brynu condomau dynion a menywod mewn fferyllfeydd, yn ogystal â pheiriannau gwerthu, archfarchnadoedd, modurdai a siopau eraill.

Adolygwyd y dudalen hon ddiwethaf: 26ain Tachwedd 2025