Cysylltu â’r tîm Lles Economeg a Gwerth

Cafodd Tîm Lles Economeg a Gwerth Iechyd Cyhoeddus Cymru ei sefydlu ym mis Mawrth 2024 er mwyn mynd i’r afael ar angen dybryd am fuddsoddiad cynaliadwy mewn iechyd a lles. Ei nod yw gwneud hyn trwy fabwysiadu dulliau iechyd cyhoeddus seiliedig ar werth yn ehangach, gan ganolbwyntio ar atal.

Rydym yn dîm angerddol sy’n ymroi i wneud gwahaniaeth ystyrlon gyda ein gwaith. Mae ein harbenigeddau amrywiol yn cwmpasu economeg iechyd, dadansoddi data, ymchwil iechyd cyhoeddus, datblygu polisi, rheoli rhaglenni, a chymorth gweithredol.

Beth ydym ni’n ei wneud?

Mae’r tîm yn canolbwyntio ar gasglu, cynhyrchu a lledaenu tystiolaeth. Mae’n defnyddio economeg iechyd a dulliau gwerth cymdeithasol i gefnogi’r gwaith o flaenoriaethu adnoddau a chyllidebau yn strategol, gyda phwyslais ar ymyriadau ataliol i wella canlyniadau’r boblogaeth ac i sicrhau gwytnwch system hirdymor. 

Ein nod

Rydym yn ymdrechu i ddefnyddio gwybodaeth a chefnogi’r broses o wneud penderfyniadau trwy syntheseiddio tystiolaeth, ymgysylltu â rhanddeiliaid, meithrin gallu, cynnal gwerthusiadau economaidd a modelu a chynhyrchu briffiau polisi.

Ein nod yw gwella canlyniadau iechyd i bobl Cymru a thu hwnt drwy ddylanwadu ar bolisi iechyd cenedlaethol ac ar benderfyniadau buddsoddi a thrwy’n cydweithrediad rhyngwladol â Sefydliad Iechyd y Byd.

Mae ein meysydd arbenigedd allweddol yn cynnwys: gwerthuso a modelu economaidd, dulliau sy’n seiliedig ar werth cymdeithasol, ac economi llesiant. Am fwy o wybodaeth ar y meysydd hyn, ewch i dudalen pwnc gwerth cymdeithasol ac economeg.

Pwy sy’n gweithio gyda ni

Mae’r tîm Lles Economeg a Gwerth yn gweithio gydag ystod eang o randdeiliaid gan gynnwys: gweithwyr proffesiynol o Iechyd Cyhoeddus Cymru, y GIG, Llywodraeth Cymru, byrddau iechyd ac ymddiriedolaethau’r GIG, a chyrff iechyd cyhoeddus lleol. Rydym hefyd yn cydweithio â Swyddfa Ranbarthol Sefydliad Iechyd y Byd ar gyfer Buddsoddi mewn Iechyd a Llesiant (Fenis, yr Eidal) ar Fenter Economi Llesiant Sefydliad Iechyd y Byd, ac i gyflawni’r Memorandwm Cyd-ddealltwriaeth rhwng Sefydliad Iechyd y Byd, Ewrop a Llywodraeth Cymru. 

Rydym hefyd yn cael ein cynrychioli ar Grŵp Economeg Iechyd Sector Cyhoeddus Cymru, Economeg Iechyd a Gofal Cymru, Grŵp Modelu Polisi Llywodraeth Cymru, a Grwpiau Economeg Iechyd y Pedair Gwlad. Mae Iechyd Cyhoeddus Cymru hefyd yn aelod o’r Sefydliad Gwerth Cymdeithasol.

Gweithio gyda ni

Mae’r tîm Economeg a Gwerth yn darparu cymorth sy’n gysylltiedig â gwerthuso a dadansoddi economaidd, modelu economaidd a defnyddio methodolegau a dulliau gwerth cymdeithasol. Rydym hefyd yn ceisio adeiladu gallu a chapasiti mewn perthynas ag economeg iechyd a gwerth cymdeithasol ar draws y system, ac i weithio gyda phartneriaid i sicrhau bod ein gwaith yn cael effaith diriaethol ar benderfyniadau polisi a buddsoddi.

Cysylltu â ni

Os hoffech drafod sut y gallem weithio gyda chi, cysylltwch â ni gan ddefnyddio’r cyfeiriad e-bost canlynol [email protected].